කොනිත්තන සිහින

ඔබේ ලොකු සිහින අතර
මගේ පොඩි සිහින ගුලිව ඇත 
වැලපෙත , කෑ ගසත ;
නමුත් ඔබට නෑසෙනවා වෙන්න ඇත
ඊට කම් නැත
විටින් විට කොනිත්තා මසිත
රිදෙනවා දැයි අසන 
මගේ  මේ  ආලය බෝම අන්ධයි පෙම්වත.

විටින් විට විත්

ප්‍රථම ප්‍රේමය මා නිවාලයි

අද දවස කෙලෙසද අසයි

පවුලේ සැප දුක් විමසාලයි

නැවත මා දැක ගන්න කැමති බව කියයි...

සය වසක් ඉක්ම  ගොස් ඇත

මා නිවාලන්නේ ඒ වදන්මද

නැතිනම් 

කාලයා වද ....

ප්‍රථම ප්‍රේමය

කවුරුන් හෝ ප්‍රථම ප්‍රේමය ගැන  සිහි නගන විට
සැනින් මතක් වෙයි මට ඔබව;

ස්නේහයෙන් මතකයට නඟමි
නොවූ බව දහසක් වූ අපේක්ෂාවන් අපට,
ආදරය රාගයෙන්  තොරව 
සඳ එළිය සේ ගගනත සැරුව බවට,

එහෙත් මතක් වෙන විට 
කොහේ හෝ වරදක් වූ බවට;

අමතක කරන්නට සිතමි
ප්‍රථම ප්‍රේමය ......

මතකය සුන්දරය
කළු වළාවන් දැවටුව නොවුමනාමය....

දින බිලියන ගණනින් ගෙවුනද
ඉර කිසි දිනෙක කියා නැත
මහා පොලොව
නුඹ මට අයිති බව

ආදරයද

එලෙසම එලිය දේ 

මුළු ලොවට

උරුම කම් නොකියන 

සඳ

කළුවර අහස හා

වළාකුළු සසල වුන.......

සිප්පි කටු.....

ඇතැමෙක් යහමින් වේගයෙන්
ඇහිඳිද්දී
තවකෙක් සෙමෙන් ටිකක් ඇහිඳී...

එහෙත් කිසිවෙකුටත්
සියල්ලම
ඇහිඳිය නොහැකි

මේ මඟ හැරුම
ඔබට යන්තමින් රිදෙන්නටය
සැබැවින්ම මතු දිනක
මා නිසා
නොරිදෙන්නටය;

දියවෙන්න පෙර

මට අල්ලන්න බැරිවෙච්ච

ගිම්හානයට වට තුහින බිඳ 

ඔබ විය

සීතල ගෑවිච්ච ;